Л. Н. Гумилев атындағы Еуразия ұлттық университетінде қазақ тіліндегі медиаматериалдарды ымдау тіліне автоматты түрде аударатын SignBridge AI жүйесі әзірленіп жатыр.
Бұл туралы Орталық коммуникациялар қызметіндегі брифингте
Ғылым және жоғары білім вице-министрі Динара Щеглова мәлімдеді, деп хабарлайды
Kazinform агенттігінің тілшісі.
Оның айтуынша, бүгінде қазақстандық жоғары оқу орындары
жасанды интеллект саласындағы оқытумен ғана шектелмей, түрлі салаларға арналған
өздерінің цифрлық шешімдерін жасау кезеңіне өтіп жатыр.
— Еуразия ұлттық университеті қазақ тіліндегі
медиаматериалдарды ымдау тіліне автоматты түрде аударатын SignBridge AI жүйесін
енгізіп жатыр. Бұл жоба қазірдің өзінде Jibek Joly телеарнасында қолданылып
жатыр, — деп атап өтті Динара Щеглова.
Вице-министрдің айтуынша, отандық университеттер
әзірлеген жасанды интеллект негізіндегі жобалар қазірдің өзінде білім беру,
медицина, өнеркәсіп, туризм, қаржы секторы және цифрлық қауіпсіздік салаларында
қолданылып жатыр.
Мәселен, Astana IT University күн панельдеріндегі
ақауларды дрондардың көмегімен анықтауға мүмкіндік беретін EnergyDronesAI
жүйесін жасады.
Ал Шығыс Қазақстан техникалық университеті шахталардағы
қозғалысты бақылауға және өнеркәсіптік қауіпсіздікті қамтамасыз етуге арналған
Smart Safety Monitor жүйесін әзірледі.
Жоба Дүниежүзілік банктің гранттық қолдауына ие болды.
Сонымен
қатар, Астана медицина университеті ZhanCare.AI телемедициналық платформасын енгізіп жатыр.
Сондай-ақ
Astana IT University трансплантология
саласындағы дәрігерлерді қолдауға арналған CortexAI жүйесімен жұмыс істеуде.
Бұл
жоба Сауд Арабиясының халықаралық грантының жеңімпазы атанды.
Бұған
дейін Қазақстан ЕАЭО елдері үшін индустриялық ЖИ-зертханалар желісін құруды
ұсынған болатын.
Дереккөз: https://www.inform.kz/ru/ii-proekti-dlya-obrazovaniya-i-meditsini-razvivayut-v-kazahstane-db0cd542