Қазақстанда жоғары және жоғары оқу орнынан кейінгі білімнің мемлекеттік жалпыға міндетті стандарттарына өзгерістер енгізілді, деп хабарлайды Kazinform агентствосының тілшісі.
Ғылым және жоғары білім министрінің міндетін атқарушының 2026 жылғы 4
мамырдағы тиісті бұйрығы цифрлық сауаттылыққа, жасанды интеллектті пайдалануға
және инклюзивті оқытуды дамытуға қойылатын талаптарды күшейтуді қарастырады.
Құжатқа сәйкес, жоғары және жоғары оқу орнынан кейінгі білім беру ұйымдары
кәсіптік стандарттарды ескере отырып, білім беру бағдарламаларын өз бетінше
әзірлейді. Олар инклюзия мен тұрақты даму құндылықтарын қалыптастыруға, зерттеу
дағдыларын, сыбайлас жемқорлыққа қарсы мәдениетті дамытуға, сондай-ақ өмір
тіршілігінің қауіпсіздігін қамтамасыз етуге және экологиялық тәрбиеге
бағытталуы тиіс.
Жоғары оқу орындары жасанды интеллектті қолдану саласындағы құзыреттерді
қалыптастыруға бағытталған білім беру бағдарламаларын әзірлейді және іске
асырады деп жеке бекітілген.
Педагогикалық бағыттардың білім беру бағдарламаларына ерекше білім беру
қажеттіліктері мен шектеулі денсаулық мүмкіндіктері бар балаларды сүйемелдеу
және қолдау бойынша пәндер енгізіледі.
Сондай-ақ, білім беру бағдарламаларын оқытушылардың, жұмыс берушілердің
және студенттердің қатысуымен академиялық комитеттер әзірлейтіні нақтыланды.
2026 жылғы 12 шілдеден бастап жалпы білім беретін пәндер циклінің міндетті
компонентінің пәндеріне жаңартылған талаптар күшіне енеді. Олар цифрлық
сауаттылықты дамытуға, заманауи технологияларды, интернет-ресурстарды, бұлттық
және мобильді қызметтерді пайдалану дағдыларын меңгеруге бағдарланған болады.
Өзгерістер жоғары оқу орнынан кейінгі білімге де қатысты. Атап айтқанда,
магистранттар мен докторанттардың эксперименталды-зерттеу жұмысы заманауи
цифрлық технологияларды қолдана отырып орындалуы тиіс болады.
Бұдан басқа, құжатта жоғары оқу орындарының білім беру қызметіне
лицензияның қолданылу мерзімі ішінде біліктілік талаптарын сақтауға міндетті
екені нақтыланды.
Бұйрық 2026 жылғы 24 мамырдан бастап күшіне енеді, 12 шілдеден бастап
қолданысқа енетін жекелеген нормаларды қоспағанда.
Бұған дейін Еңбек министрлігі Қазақстанда ЖИ-дің салдарынан 400 мыңға дейін
жұмыс орны қысқаруы мүмкін екенін айтқан болатын.