Жоспар 8 блок пен 100 негізгі іс-шараны қамтиды. Құжат цифрлық экономиканың міндеттерін — стратегиялық және реттеушілік қамтамасыз етуден бастап салаларды цифрландыруға, киберқауіпсіздікті дамытуға, инфрақұрылымды жетілдіруге және жаңа экономиканы қалыптастыруға дейінгі бағыттарды қамтиды. Жылдың ресми ашылуы наурыз айында Alem.AI алаңында өтеді.
Цифрлық стратегия: IT және ЖИ үшін жаңа ережелер
Бұл бағыт аясында «Digital Qazaqstan» стратегиясын әзірлеу, сондай-ақ отандық IT-компаниялар үшін салықтық және реттеушілік ынталандыру шараларын қалыптастыру жоспарланған. Цифрландыру, ЖИ, деректер, киберқауіпсіздік, телекоммуникациялар және цифрлық активтер салаларында негізгі заңнамалық бастамалардың кемінде 90%-ын қабылдау көзделген.
ЖИ мектептер мен ЖОО-ларда: болашақ кадрларға басымдық
AI-SANA бастамасы мектептерден бастап ересектерді қайта даярлау бағдарламаларына дейін барлық деңгейде ЖИ-білім беруді енгізуді көздейді. Day of AI Qazaqstan жобалары мен TUMO Centers ашу пысықталуда. Кемінде 450 мың білім алушы мен педагогты қамту жоспарланған. 2026 жылы AI University алғашқы кезеңі басталып, өңірлерде Tomorrow School мектебін кеңейту жүзеге асырылады. Сондай-ақ AI Governance 500, AI Qyzmet және AI Corporate бағдарламалары іске қосылады.
Мемлекеттік аппарат цифрлық форматта: мемлекеттік органдар жұмысы қалай өзгереді
Мемлекеттік органдар цифрлық басқару моделіне көшеді:
– мемлекеттік қызметшілердің кемінде 80%-ы Gov Workspace цифрлық жұмыс орнымен қамтылады;
– кемінде 50 мемлекеттік қызмет ЖИ қолдану арқылы көрсетіледі;
– мемлекеттік ақпараттық жүйелердің кемінде 30%-ы QazTech платформасына көшіріледі.
Сонымен қатар пойыздарда, ұшақтарда, туристік аймақтарда және шекара нысандарында интернет қолжетімділігін қамтамасыз ету, оның ішінде Direct to Cell спутниктік байланысын іске қосу жоспарлануда.
Деректерді қорғау: киберқауіпсіздік пен дата-орталықтарды күшейту
Жоспарда дербес деректерді қорғауды күшейту, мемлекеттік ақпараттық жүйелердің киберқауіпсіздігін аудиттен өткізу және оларды жаңа мемлекеттік дата-орталыққа басым тәртіппен көшіру қарастырылған.
Мұнайдан егістікке дейін: ЖИ негізгі салаларда қалай енгізіледі
Басым бағыттардың қатарында — энергетикаға ЖИ енгізу, геологиялық деректердің кемінде 90%-ын цифрландыру, трансшекаралық логистиканың цифрлық контурын іске қосу, ауыл шаруашылығы жерлерін ЖИ-мониторингтеу арқылы өнімділікті 10%-ға арттыру, құрылыста BIM-модельдеу және қаржы ұйымдарының кемінде 30%-ын бірыңғай цифрлық ортаға қосу бар.
Ақылды қалалар және жылдам интернет: өңірлерді не күтіп тұр
2026 жылы ауылдарда талшықты-оптикалық байланыс желілерін салу, автожолдарда мобильді интернетті кеңейту және 20 қалада 5G желісін дамыту жоспарланған. ХҚКО-лар өзіне-өзі қызмет көрсету аймақтары бар халыққа арналған цифрлық кеңселерге айналады.
Жоғары жылдамдықты интернетке халықтың 99%-ы қол жеткізеді деп күтілуде, ал қалалық ортаның жайлылық индексі жыл сайын кемінде 15%-ға өседі.
Болашақ экономикасы: дрондар, криптоиндустрия және спутниктер
Іс-шаралар қатарында — ұшқышсыз индустрияны және төмен биіктіктегі экономиканы дамыту, реттелетін криптоиндустрия мен цифрлық активтерді іске қосу, мемлекеттік майнинг, сондай-ақ отандық спутниктерді орбитаға шығару және экспорттау бар.