ҚР Ғылым және жоғары білім министрлігі NVIDIA, Google, Astana Hub, EduSystem, Huawei және Coursera сияқты жетекші халықаралық компаниялармен белсенді ынтымақтастық орнатуда.
Олардың әрқайсысымен цифрлық технологиялар, жасанды
интеллект және инновациялық білім беру салаларындағы құзыреттерді дамытуға
бағытталған бірлескен бастамалар мен жобалар жүзеге асырылуда. Мысалы,
Coursera-мен бірлескен жұмыс аясында үш жыл ішінде 197 мың студент оқудан өтіп,
388 мың сертификат алды. Платформада жасанды интеллект бойынша 225 курс
қолжетімді. Бұл туралы ҚР Ғылым және жоғары білім вице-министрі Динара Щеглова
хабарлады.
AI-Sana бағдарламасы аясында студенттер 72 406 сертификат
алды, бұл олардың цифрлық технологиялар мен жасанды интеллект бағыттарына
жоғары қызығушылық танытатынын көрсетеді.
«Жасанды интеллект саласында кадрлар даярлау және
зерттеулер жүргізу үшін жоғары оқу орындарындағы инфрақұрылымды дамытуға ерекше
көңіл бөлінеді. Жетекші университеттер базасында ғылым мен тәжірибе ұштасатын
арнайы орталықтар мен зертханалар құрылды. Бүгінде ЖИ орталықтары Шығыс
Қазақстан техникалық университетінде, Astana IT University-де, Қазақ ұлттық
университетінде, Атырау мұнай және газ университетінде, Alikhan Bokeikhan
University-де және басқа да жоғары оқу орындарында табысты жұмыс істеп тұр», —
деп атап өтті вице-министр.
Сонымен қатар, жасанды интеллект бойынша жеке кафедралар
Қазақ ұлттық университетінде, Халықаралық қазақ-түрік университетінде,
Халықаралық ақпараттық технологиялар университетінде және Astana IT
University-де ашылған. Бұдан бөлек, бірнеше ғылыми зертхана жұмыс істейді. 2019
жылдан бері жұмыс істеп келе жатқан Назарбаев Университетінің Ақылды жүйелер
және жасанды интеллект институты 2024 жылы толыққанды ғылыми-зерттеу
институтына айналдырылды.
Сондай-ақ Қазақ ұлттық
университеті, Еуразия ұлттық университеті, Satbayev University, Назарбаев
Университеті сияқты жоғары оқу орындарының базасында суперкомпьютердің
академиялық кластері қалыптастырылып жатыр. Болашақта бұл қуаттарды бірыңғай
желіге біріктіріп, елдегі барлық жоғары оқу орындарына қолжетімді ету міндеті
қойылған. Бұл Қазақстанға академиялық есептеулер мен халықаралық серіктестермен
бірлескен зерттеулер бойынша өңірлік көшбасшылар қатарына кіруге мүмкіндік
береді.
Еске салайық, 21 қарашада Алматыда білім беру саласындағы
ақпараттық технологияларға арналған PROFIT Education Day конференциясы өтеді.