Құжат білімдегі ЖИ қолданудың бірыңғай ұлттық стандарттарын бірінші рет бекітеді — этика, құқықтық реттеу, дербес деректерді қорғау және академиялық адалдыққа баса назар аудара отырып.
Тұжырымдама
мектептер мен колледждерді қамтиды, оқу бағдарламаларына ЖИ тақырыптарын
енгізуді, цифрлық оқулықтар жасауды, оқушылардың ЖИ сауаттылығын дамытуды және
педагогтардың біліктілігін үш деңгейлі модель бойынша арттыруды қарастырады:
Acquire → Deepen → Create.
«Тұжырымдама
стратегиялық басымдықтарды анықтап қана қоймай, енгізудің нақты механизмін,
мониторинг жүйесін және жол картасын бекітеді, бұл Қазақстанның мектептері мен
колледждерінде AI-дың жүйелі, жауапты және қауіпсіз пайдаланылуын қамтамасыз
етеді. Бұл ретте жасанды интеллект мұғалімді алмастырмайтынын, керісінше оның
рөлін күшейтетінін түсіну маңызды. Білім беру үдерісіндегі барлық маңызды
шешімдер адам қолында қалады», — деп атап өтті ағарту министрі Ғани Бейсембаев.
Баланың
құқықтарын қорғауға және мұғалімнің рөлін нығайтуға ерекше назар аударылады.
Академиялық адалдық пен ЖИ пайдаланудың бірыңғай этика ережелері енгізіледі.
«Жасанды
интеллектті білімге енгізу — Қазақстанның цифрлық трансформация стратегиясының
бір бөлігі. Біз мектеп оқушылары мен студенттер цифрлық құралдарды қолданып
қана қоймай, олардың жасаушыларына айналуы үшін жағдай жасаймыз. Тұжырымдама
ұлттық құндылықтар мен академиялық адалдықты сақтай отырып, болашақ
технологиялармен сенімді жұмыс істейтін мамандар ұрпағын өсіруге мүмкіндік
береді», — деп атап өтті цифрлық даму, инновациялар және аэроғарыш өнеркәсібі
министрі Жасұлан Мәдиев.
2025
жылдан бастап ЖИ элементтері «Цифрлық сауаттылық» және «Информатика» пәндеріне
енгізілуде. Оқушыларға Day of AI онлайн-курстары, педагогтарға біліктілікті
арттыру курстары дайындалды.
Қазақстан
ЮНЕСКО, ЭЫДҰ және ЕО ұсыныстары негізінде білімге ЖИ енгізудің ұлттық тәсілін
бекіткен алғашқы елдердің біріне айналды.