Қарағанды университетінде 11-сынып түлектерінің ата-аналарына арналған Ашық есік күні өтті. Іс-шара екі кезеңнен тұрып, қонақтарға оқу орнының білім беру бағдарламалары мен мүмкіндіктерімен жақынырақ танысуға мүмкіндік берді.
Іс-шараның бірінші бөлімі университет фойесінде өтті. Мұнда әрбір кафедра
өз білім беру бағдарламаларын таныстырды. Ата-аналар дайындық бағыттарымен, оқу
жоспарларымен және студенттерге ұсынылатын қосымша мүмкіндіктермен танысып,
оқытушыларға сұрақтар қойып, балаларының болашақтағы оқуына қатысты жан-жақты
кеңес алды.
Іс-шараның екінші бөлігінде акт залында ата-аналар алдында университеттің
жетекші өкілдері сөз сөйледі. Басқарма мүшесі және академиялық мәселелер
жөніндегі проректор Г.А. Сивякова университеттің дамуындағы негізгі бағыттар
мен студенттер үшін жаңа мүмкіндіктер туралы айтып берді. Қабылдау
комиссиясының хатшысы А.Х. Баймағамбетова ҰБТ-ға тіркелу және оны өткізу
ережелерін егжей-тегжейлі түсіндіріп, ата-аналардың оқуға түсу рәсіміне қатысты
сұрақтарына жауап берді.
Қазақстан тарихы және жалпы білім беру пәндері кафедрасының меңгерушісі
Ж.К. Капашева «Бүкіл әлем — университет: балаларыңыз үшін жаңа мүмкіндіктер»
тақырыбында баяндама жасады. Ол қазіргі білім беру жүйесі студенттерге
халықаралық бағдарламаларға, тағылымдамаларға және кәсіби әрі тұлғалық
дағдыларды дамытуға арналған түрлі платформаларға қол жеткізуге жол ашатынын
атап өтті.
Ұйымдастырушылардың айтуынша, мұндай іс-шаралар ата-аналарға білім беру
үдерісінің қалай жүзеге асатыны туралы толық түсінік алуға және балаларының
болашақ жолын таңдауда қолдау көрсетуге көмектеседі.
Фотогалерея
