2026 жылғы 12–17 шілде аралығында Green Crops Polska компаниясымен (Польша Республикасы) бірлесіп іске асырылатын «Quality Systems in Modern Agriculture: A Practical Perspective» халықаралық ынтымақтастық бағдарламасы аясында Қазақстан, Латвия, Өзбекстан, Қырғызстан және Тәжікстан жоғары оқу орындары өкілдері делегациясының таныстыру сапары өтті.
Бағдарлама қатысушылары Польшаның аграрлық секторының жетекші кәсіпорындары — Green Crops Farm, Green Factory және Horticultural Farm мекемелерінде болып, заманауи өндіріс технологияларымен, сапаны басқарудың инновациялық тәсілдерімен және ауыл шаруашылығы саласындағы озық тәжірибелермен танысты.
Бағдарламаның маңызды бөлігі ретінде делегация Цеханув қаласындағы И. Мосцицкий атындағы Мемлекеттік қолданбалы ғылымдар академиясының базасында өткен IV Халықаралық конференция жұмысына белсенді қатысты. Конференция тәжірибе алмасуға, аграрлық саланың өзекті мәселелерін талқылауға және халықаралық академиялық әріптестікті дамытуға арналған тиімді алаңға айналды.
Қол жеткізілген нәтижелер білім беру ұйымдары мен шетелдік серіктестер арасындағы ынтымақтастықты нығайтуға жаңа мүмкіндіктер ашады. Халықаралық байланыстарды одан әрі дамыту аясында жоғары оқу орындарының өкілдері, оның ішінде Қарағанды индустриялық университетінің Стратегиялық даму және интернационалдандыру департаментінің директоры Алтынарай Такибаева, Латвияның Өмір туралы ғылымдар және технологиялар университеті (LBTU) тарапынан жоба консорциумының үйлестірушісі Ирина Кулитаненің шақыруымен Erasmus+ «Open Food Innovation University» жобасының кезекті іс-шарасына қатысады.
Серіктестердің келесі кездесуі 2026 жылғы 25–26 қыркүйекте Самарқанд мемлекеттік ветеринариялық медицина, мал шаруашылығы және биотехнологиялар университетінің (Өзбекстан Республикасы) базасында өтеді. Кездесу барысында ынтымақтастықтың алдағы бағыттары, инновациялық білім беру тәжірибелері және агроөнеркәсіптік кешен саласындағы халықаралық жобаларды дамыту перспективалары талқыланады.
Халықаралық әріптестік академиялық өзара іс-қимылдың көкжиегін кеңейтуді жалғастырып, озық тәжірибені енгізуге, ғылыми зерттеулерді дамытуға және жаңа буын мамандарын даярлау сапасын арттыруға ықпал етеді.
Фотогалерея
