15 маусымда Қарағанды индустриялық университетінде
1–10-сынып оқушыларына арналған жазғы мектептің ашылу рәсімі өтті. Бір апта
бойы оқушылар жазғы демалыстарын қызықты әрі пайдалы өткізіп қана қоймай,
ғылымның, техниканың және инженерлік білім берудің заманауи бағыттарымен танысу
мүмкіндігіне ие болады.
Жазғы мектеп бағдарламасы әртүрлі жас ерекшеліктеріне сай
әзірленген және білім беру сабақтарын, кәсіптік бағдар беру іс-шараларын,
университет кафедраларына экскурсияларды, сондай-ақ интерактивті және спорттық
белсенділіктерді қамтиды.
Бастауыш сынып оқушылары үшін қызықты химия, математика,
информатика, ағылшын тілі және қаржылық сауаттылық бойынша сабақтар
ұйымдастырылған. Оқушылардың ерекше қызығушылығын «Технологиялық машиналар және
көлік», «Энергетика», «Металлургия», «Жасанды интеллект технологиялары» және
«Құрылыс» кафедраларына жасалған экскурсиялар тудыруда. Экскурсия барысында
олар заманауи жабдықтармен танысып, инженерлік мамандықтар әлемі туралы мол
мағлұмат алады.
5–7-сынып оқушылары ағылшын және қытай тілдерін,
информатиканы, физиканы, химияны және қаржылық сауаттылық негіздерін меңгереді.
Бағдарламаға сондай-ақ университеттің бейіндік кафедраларына бару және
командалық рухты қалыптастыру мен салауатты өмір салтын насихаттауға
бағытталған спорттық іс-шаралар енгізілген.
Жоғары сынып оқушылары үшін информатика, химия, шет тілдері
және қаржылық сауаттылық бойынша сабақтар ұйымдастырылған. Бағдарламада
оқушылардың қызығушылықтары мен болашақ білім алу мүмкіндіктерін тереңірек
түсінуіне көмектесетін «Мамандық таңдау» кәсіптік бағдарлау курсына ерекше орын
берілген. Сонымен қатар, жоғары сынып оқушылары металлургия, құрылыс және
энергетика кафедраларының қызметімен танысып, сұранысқа ие инженерлік
мамандықтар мен заманауи технологиялар туралы жан-жақты ақпарат алады.
ҚарИУ-дың жазғы мектебі университеттің кәсіптік бағдар беру
жұмысының маңызды бөлігі болып табылады және оқушылардың ғылымға, техникаға
және инженерлік шығармашылыққа деген танымдық қызығушылығын дамытуға
бағытталған. Теориялық сабақтарды, практикалық іс-шараларды және университеттік
ортамен танысуды ұштастыру арқылы қатысушылар өздерінің дүниетанымын кеңейтіп,
жаңа білім мен тәжірибе жинақтап, болашақ мамандығын саналы түрде таңдауға
алғашқы қадам жасайды.
Жазғы мектеп өз жұмысын 19 маусымға дейін жалғастырады.
Алда қатысушыларды жаңа ашылымдар, қызықты сабақтар және инженерия мен
технологиялардың заманауи әлемімен танысу күтіп тұр.
Фотогалерея
