10 қарашада, Бейбітшілік пен даму жолындағы дүниежүзілік ғылым күніне орай
Қарағанды индустриялық университетінде KarIU Science Talks кездесуі өтті. Оның
тақырыбы қазіргі металлургияның перспективалы бағыттарының бірі – темірді
тікелей тотықсыздандыру болды.
Іс-шара КарИУ оқытушылары мен ғылыми қызметкерлерін, Ж. Әбішев атындағы
Химия-металлургия институтының мамандарын, сондай-ақ Теміртау мектептерінің
оқушыларын біріктірді.
Қатысушылар жаңа технологиялардың металлургиялық өндірісті қалай өзгерте
алатыны туралы әңгімелесті. Темірді тікелей тотықсыздандыру тәсілдеріне,
кәсіпорындардың энергия тиімділігін арттыруға және өнеркәсіптің қоршаған ортаға
әсерін азайтуға ерекше назар аударылды. Сондай-ақ энергия шығынын азайта
отырып, металл өндіруге және көміртегі шығарындыларын төмендетуге мүмкіндік
беретін ғылыми әзірлемелер туралы сөз болды.
Science Talks форматы күрделі өндірістік үдерістерді түсінікті әрі
қолжетімді тілде жеткізуге мүмкіндік берді. Мектеп оқушылары үшін кездесу
ғалымдар мен инженерлердің жұмысымен танысуға, металлургия ғылымы туралы
көбірек білуге және зерттеушілердің бүгінгі таңда қандай міндеттерді шешіп
жатқанын көруге мүмкіндік берді.
Мұндай кездесулер жастарға техникалық мамандықтарға жаңаша көзқараспен
қарауға көмектеседі. Қазіргі металлургия тек өндіріспен ғана емес, экологиямен,
энергетикамен, цифрлық технологиялармен және өнеркәсіп үшін қауіпсіздеу
шешімдерді іздеумен де байланысты.
Іс-шара университет, ғылыми ұйымдар мен қала мектептері арасындағы
ынтымақтастықты нығайту жолындағы тағы бір қадам болды. Ол ғылымның түсінікті,
қызықты әрі Теміртаудың өнеркәсіптік болашағымен тікелей байланысты бола
алатынын көрсетті.
Фотогалерея
