Жасанды интеллект және цифрлық даму министрлігі жасанды интеллект технологияларын пайдалану арқылы ішкі жұмыс процестерін жүйелі түрде трансформациялап келеді. Цифрландыру және ЖИ жылы аясында ведомство жаңа құралдарды ең алдымен өз жұмысында енгізуде, бұл олардың мүмкіндіктерін іс жүзінде бағалауға, қажетті құзыреттерді қалыптастыруға және кейіннен табысты шешімдерді мемлекеттік секторда кеңейтуге мүмкіндік береді.
Бүгінде министрлік қызметкерлері Ұлттық жасанды
интеллект платформасын белсенді пайдаланып, Alem-Workspace — мемлекеттік
қызметшінің бірыңғай цифрлық жұмыс кеңістігін сынақтан өткізіп, күнделікті
міндеттерді автоматтандыру үшін ЖИ-агенттерін жасап, вайб-кодинг бойынша оқудан
өтуде. Бағдарламаға ведомствоға қарасты ұйымдардың өкілдері де қосылып жатыр.
Министрлік мамандары үшін жекелендірілген
ЖИ-агенттерін құру, жұмыс процестерін автоматтандыру және ақпаратты талдауда
data-driven тәсілін қолдану біртіндеп күнделікті жұмыстың бір бөлігіне
айналуда.
Оқытуды «Ұлттық ақпараттық технологиялар» АҚ Цифрлық
үкіметті қолдау орталығымен бірлесіп ұйымдастырды. Бағдарлама теориялық
дайындық пен мемлекеттік органдардың күнделікті қызметінде ЖИ-құралдарын
қолдануға бағытталған практикалық сабақтарды ұштастырады.
Қызметкерлер құжаттарды өңдеу, талдамалық материалдар
дайындау, деректермен жұмыс істеу және ішкі цифрлық сервистер құруға арналған
технологияларды меңгеруде. Data-driven тәсіліне, яғни деректер мен аналитика
негізінде шешім қабылдау қабілетіне ерекше назар аударылады.
Оқытудың негізгі бағыттарының бірі вайб-кодинг
болды. Бұл тәсіл жасанды интеллектке мәтіндік сұраныстар беру арқылы
бағдарламалауды терең білмей-ақ цифрлық шешімдер жасауға мүмкіндік береді.
Бағдарламаға қатысушылар сайттардың, чат-боттардың, аналитикалық дашбордтардың
және ішкі сервистердің прототиптерін әзірлеуде.
Сонымен қатар министрлікте ЖИ-көмекшілер экожүйесі
қалыптасуда. Олар талдамалық анықтамалар дайындауға, үлкен көлемдегі ақпаратты
өңдеуге, салыстырмалы кестелер жасауға және басқа да күнделікті операцияларды
автоматтандыруға пайдаланылуы мүмкін.
«Біздің міндетіміз — қызметкерлерге заманауи
ЖИ-құралдарын беріп қана қою емес, сонымен бірге деректермен жұмыс істеудің
жаңа мәдениетін қалыптастыру. Біз өзімізден бастадық: министрлік мамандары
жасанды интеллект мүмкіндіктерін күнделікті қызметінде қолданып жүр.
Технологиялар күнделікті жүктемені азайтуға, аналитика сапасын арттыруға және
неғұрлым негізделген шешімдер қабылдауға көмектесуі маңызды», — деп атап өтті
Премьер-Министрдің орынбасары — Жасанды интеллект және цифрлық даму министрі
Жаслан Мадиев.
Сонымен қатар орта буын басшылары үшін ЖИ
саласындағы көшбасшыларды даярлауға арналған арнайы Leadership Program
бағдарламасы іске қосылуда. Бүкіл бастаманың қорытынды кезеңі ведомствоның
AI-Driven министрліктің мақсатты моделіне толық көшуі болады, бұл ақылды
көмекшілердің тұтас экожүйесін іске қосуды білдіреді: бақылаудағы тапсырмаларға
жауап дайындау, НҚА бойынша салыстырмалы кестелер құрастыру және басшылық үшін
тезистер қалыптастыруға арналған ЖИ-ассистенттер.
Оқыту түрлі бағыттағы қызметкерлерді қамтиды:
әкімшілік және талдамалық блоктардан бастап құрылымдық бөлімшелердің басшылары
мен цифрлық мамандарға дейін. Мұндай тәсіл мемлекеттік секторда жасанды
интеллектті тиімді әрі қауіпсіз пайдаланудың бірыңғай мәдениетін қалыптастыруға
мүмкіндік береді.
Жиналған тәжірибе, пысықталған тәсілдер мен тиімді
шешімдерді алдағы уақытта бүкіл мемлекеттік аппаратқа тарату жоспарланып отыр.
Дереккөз: https://www.gov.kz/memleket/entities/maidd/press/news/details/1237181?lang=ru