Көрмеге барған Қазақстан Республикасы университеттері делегациясының шеңберінде 29 жоғары оқу орнының басшыларына оқу процесін, ғылыми қызметті және басқарушылық аналитиканы қолдауға бағытталған Gemini және NotebookLM құралдарын қоса алғанда, Google Workspace цифрлық білім беру ортасын қалыптастыру бойынша шешімдер ұсынылды. Бүгінгі таңда Қазақстанның 15 жоғары оқу орны дербес деректер мен пайдаланушылардың ақпаратын қорғау талаптарын сақтай отырып, Google Workspace қорғалған корпоративтік ортасы аясында Gemini және NotebookLM құралдарын пайдаланып жатқаны атап өтілді.
Бағдарламаның негізгі оқиғасы Қазақстан Республикасының Ғылым және жоғары білім министрі Саясат Нұрбектің Google-дың жоғары білім беру бағытының жетекшісі Анна Артемьевамен, сондай-ақ Google-дың Орталық Азиядағы серіктесі Stem Solutions компаниясының директоры Диас Бақасаринмен жеке жұмыс кездесуі болды.
Кездесу және университет өкілдерімен кейінгі талқылаулар барысында жоғары білім беруде AI-шешімдерді енгізудің халықаралық мысалдары қаралды. Атап айтқанда, пилоттық бағдарлама аясында Gemini енгізілген University of Oxford тәжірибесі ұсынылды, сондай-ақ оқуды және академиялық жұмысты қолдау құралы ретінде университеттің барлық оқытушылары мен студенттері үшін NotebookLM-ді қосу туралы шешім қабылданды.
Тараптар жасанды интеллектіні тек білім беру процесінде ғана емес, сонымен қатар университеттерді басқаруда — соның ішінде білім беру деректерінің аналитикасын, оқытушыларды қолдауды, оқытуды дербестендіруді және әкімшілік процестердің тиімділігін арттыруды қолдану тәсілдерін талқылады. Келіссөздер нәтижесінде Қазақстанның университет ортасында пилоттық жобаларды іске қосу форматтары белгіленді.
Делегация мүшелерінің пікірінше, BETT 2026 көрмесінде ұсынылған тәжірибе жоғары білім берудің жаңа кезеңге — инфрақұрылымды цифрландырудан академиялық және басқарушылық процестерде жасанды интеллектіні жүйелі пайдалануға көшуін растайды. Қол жеткізілген уағдаластықтар мен халықаралық тәжірибелерді Қазақстандағы білім беру және цифрлық бастамаларды іске асыру кезінде пайдалану жоспарлануда.