2025 жылғы 18–20 маусым аралығында Грекияның Александруполис қаласында өткен EEPES 2025 (Electronics, Engineering Physics and Earth Science) халықаралық ғылыми конференциясына Қарағанды индустриялық университеті (ҚарИУ) белсенді қатысты. Университет «Жоғары кернеулі тұрақты ток (HVDC) желілері арқылы электр энергиясын беру технологиялары: халықаралық тәжірибе және Қазақстандағы даму бағыттары» тақырыбында ғылыми жұмыс ұсынды. Бұл баяндама «Энергия тиімділігі және қолданбалы термодинамика» онлайн-секциясында ұсынылып, ғылыми қауымдастықтың қызығушылығын тудырды.
EEPES 2025 конференциясы инженерлік физика, электроника, телекоммуникация, жаңартылатын энергия және жасанды интеллект салаларындағы заманауи зерттеулерге арналған халықаралық алаң болды. Конференция гибридті форматта өтті, яғни қатысушылар офлайн және онлайн түрде қатысу мүмкіндігіне ие болды. ҚарИУ-дың қатысуы университеттің халықаралық ғылыми интеграцияға деген ұмтылысын және энергетика саласындағы өзекті мәселелерді шешуге бағытталған зерттеулерінің маңыздылығын көрсетті.
Баяндамада HVDC технологияларының әлемдік тәжірибесі мен Қазақстанның энергетикалық жүйесінде оларды енгізу мүмкіндіктері талқыланды. Бұл технологиялар энергия тиімділігін арттыру және энергиямен жабдықтаудың тұрақтылығын қамтамасыз ету үшін маңызды болып табылады.
ҚарИУ-дың EEPES 2025 конференциясына қатысуы университеттің ғылыми-зерттеу қызметінің жоғары деңгейін және халықаралық ынтымақтастықты нығайтуға деген ұмтылысын тағы бір мәрте дәлелдеді.
