2025 жылдан бастап Қарағанды индустриялық университетінде (ҚарИУ) Тюмень индустриялық университетімен бірлескен «Өнеркәсіптік объектілерді энергиямен қамтамасыз ету» атты білім беру бағдарламасы жүзеге асырылуда. Аталған білім беру бағдарламасы аясында мамандықтың оқу жоспарларына «Жобалық қызмет» пәні енгізілді. Бұл пән жобаларды басқарудың әдістері мен қағидаттарын, соның ішінде мәселені талдау, мақсат қою, жоспарлау, орындау, бақылау және инженерлік шешім әзірлеу мақсатында жобаны аяқтау кезеңдерін зерделеуге бағытталған. Пәннің негізгі мақсаттары – студенттердің өзіндік және командалық жұмыс дағдыларын қалыптастыру, сыни ойлауын дамыту, сондай-ақ алған теориялық білімдерін тәжірибеде қолдана білу қабілетін жетілдіру.
2025 жылғы 19 желтоқсанда ЭПО-25 тобы студенттерінің алғашқы жобаларын қорғау өтті. Жобалық жұмыстардың тақырыптары ретінде студенттер өзекті әрі әлеуметтік маңызы бар бағыттарды таңдады: «Қазақстанның Теміртау қаласындағы ауданы 120 м² болатын екі қабатты тұрғын үй үшін жаңартылатын энергия көздері», «Тұрғын үйді автономды энергиямен қамтамасыз етудің баламалы жүйесі», «Металлургия саласындағы энергия үнемдеу тәсілдері». Семестр барысында студенттер командаларда жұмыс істеп, жобалық қызметтің барлық кезеңдерінен – мәселені және мақсаттарды тұжырымдаудан бастап инженерлік шешімдерді әзірлеу мен негіздеуге дейін – жүйелі түрде өтті. Қорғау барысында жобалардың презентациялары ұсынылып, «Энергетика» кафедрасының оқытушыларының сұрақтарына жан-жақты жауаптар берілді.
Студенттер жүзеге асырып жатқан жобалар Тұрақты даму мақсаттарымен тікелей байланысты:
– «Қолжетімді және таза энергия» – жаңартылатын және баламалы энергия көздері саласындағы шешімдерді әзірлеу арқылы;
– «Индустрияландыру, инновациялар және инфрақұрылым» – энергия тиімді және инновациялық технологияларды енгізу арқылы;
– «Тұрақты қалалар мен елді мекендер» – тұрғын ғимараттардың энергия тиімділігін арттыру жолымен;
«Жауапты тұтыну және өндіріс» – өнеркәсіптегі энергия үнемдеу әдістерін зерттеу және қолдану арқылы.
«Жобалық қызмет» пәні және оның аясында орындалған студенттік жобалар ҚарИУ-дың Erasmus+ жобасының логикасы мен құндылықтары шеңберінде жүзеге асырылуда. Бұл жоба практикалық бағыттағы білім беруді дамытуға, халықаралық академиялық ынтымақтастықты кеңейтуге және инженерлік кадрларды даярлауда заманауи еуропалық тәсілдерді енгізуге бағытталған. Жобалық жұмыс студенттердің халықаралық еңбек нарығында сұранысқа ие кәсіби және әмбебап құзыреттерін қалыптастыруға, сондай-ақ тұрақты ойлау мен қабылданатын инженерлік шешімдер үшін жауапкершілікті дамытуға ықпал етеді.
Просмотров: 0