ҒЫЛЫМ АПТАЛЫҒЫ ӨЗ МӘРЕСІНЕ ЖЕТТІ
Қарағанды индустриялық университетінде 12 сәуір - Ғылым қызметкерлерінің күніне орай ұйымдастырылған Ғылым апталығы өз мәресіне жетті.
Апталық аясында ғылыми семинарлар, республикалық конференция, хакатон, олимпиадалар, ғылыми көрмелер өткізіліп, ғылым саласындағы соңғы жетістіктер таныстырылды. Сондай-ақ, 10 сәуір күні онлайн форматта «Металлургиядағы инновациялық технологиялар» атты Халықаралық ғылыми семинары өтті. Ғылыми семинарға Түркия, Ресей, Өзбекстан ғалымдары мен ҚР университеттерінің ғалымдары қатысты. Бүгін апталық аясындай өткізілген біршама іс-шаралар қорытындыланып, университетімізде ғылымды дамытуға үлес қосып жүрген ғалымдар мен профессор-оқытушылар «Ғылымды дамытуға қосқан үлесі үшін» алғыс хатымен марапатталды.
Қорытынды кеште оқу ордамыздың ректоры Болатбек Абдрасилов, Теміртау қаласы әкімінің әлеуметтік мәселелер жөніндегі орынбасары Самат Зияшев құттықтау сөз сөйлеп, университетіміздің ғалымдарына алғысын білдірді. Сондай-ақ, Ғылым апталығы аясында «Жас ғалым» гранттық қаржыландыру жобасының жеңімпаздары, колледж бен мектеп білім алушылары арасында өткен қалалық Хакатон жеңімпаздары, «Экономикалық эрудит» олимпиадасының жүлдегерлері, облысымыз бойына 11 сынып оқушылары арасындағы математика және физика пәнінен өткен олимпиада және кәсіби мереке қарсаңында 2022 жылдың нәтижесі бойынша «Үздік ғылыми қызметкер – 2022» жеңімпаздары анықталып, марапатталды.
Тағы бір аузы толтырып айтарлық ауқымды шара, 7 сәуір күні университетімізде өткен «ЖАСТАР, ҒЫЛЫМ ЖӘНЕ ТЕХНОЛОГИЯ: ЖЕТІЛДІРУ ЖӘНЕ ЫҚПАЛДАСУ ЖОЛДАРЫ» атты жыл сайынғы LIII республикалық ғылыми-тәжірибелік конференция. Пленарлық отырысқа Теміртау қаласы әкімінің әлеуметтік мәселелер жөніндегі орынбасары - Зияшев Самат Саятұлы, «АрселорМиттал Теміртау» АҚ трансұлттық компаниясының және «Фитохимия» халықаралық ғылыми-өндірістік холдингі» АҚ өкілдері қатысты.
Ғылым апталығының жоғары деңгейде өтуіне мұрындық болған барлық ұйымдастырушыларға, демеушілерге, қатысушыларға алғыс білдіремін!
