ҚАРИУ – ХАЛЫҚАРАЛЫҚ ҒЫЛЫМИ ДИАЛОГ АЛАҢЫ
15 қазан күні Қарағанды индустриялық университеті мен Қазақстан Республикасы Ұлттық инженерлік академиясының Қарағанды филиалының ұйымдастыруымен Теміртау қаласының 80 жылдығына орай «Инновациялық технологиялар және инжиниринг» атты XIII Халықаралық ғылыми-тәжірибелік конференция өтті.
Іс-шара 200-ден астам қатысушыны — ғалымдар, инженерлер, студенттер, бизнес және мемлекеттік органдар өкілдерін біріктірді. Конференция өңірдің ғылыми-білім беру және өндірістік әлеуетін дамытудағы маңызды кезеңге айналды. Конференция аясында Польша, Болгария, Малайзия, Беларусь Республикасы, Өзбекстан және Ресей Федерациясынан келген қатысушылардың 155 ғылыми баяндамасы тіркелді.
Конференция барысында үш негізгі секция өткізілді:
1-секция: «Жаңа материалдар, жасыл технологиялар және өнеркәсіптегі инновациялық шешімдер»
Сарапшылар экологиялық таза технологиялар мен материалдар саласындағы озық әзірлемелерді талқылады. Олар өндірістің тиімділігін айтарлықтай арттырып, қоршаған ортаға теріс әсерді азайтуға мүмкіндік береді. Ауыр өнеркәсіпке орнықты шешімдерді енгізуге ерекше назар аударылды.
2-секция: «Сандық инжиниринг, энергетика және құрылыс – болашақ индустриясының драйверлері»
Мамандар энергетика және құрылыс секторларын дамытудағы цифрлық технологиялардың рөліне тоқталды. Бұл салалар орнықты әрі жоғары технологиялық өсімнің негізі бола алады. «Ақылды» қалалар мен энергетикадағы инновациялар бойынша жасалған баяндамалар ерекше қызығушылық тудырды.
3-секция: «Білім экономикасы, инновациялық менеджмент және орнықты даму мүддесіндегі білім трансформациясы»
Секция аясында білім беру бағдарламаларын жетілдіру, білім экономикасына мамандар даярлау мәселелері қаралды. Қатысушылар басқарудың инновациялық әдістері мен білім беру технологияларын енгізу тәжірибесімен бөлісті.
Конференцияда шетелдік ғалымдар баяндама жасады:
— Мохамад Сязли Фатхи, PhD, Малайзия Технологиялық университетінің профессоры
— Агнешка Домбска, PhD, Польша, Варшава технологиялық университетінің профессоры
— Калоян Христов, PhD, Болгария, София техникалық университетінің профессоры
Конференцияның басты нәтижелерінің бірі – Қарағанды индустриялық университеті мен София техникалық университеті арасындағы халықаралық ынтымақтастық туралы келісімге қол жеткізу болды. Бұл келісім инженерия мен инновациялық технологиялар саласында бірлескен ғылыми зерттеулер, студенттер мен оқытушылардың академиялық алмасуы және халықаралық жобаларды іске асыру үшін жаңа мүмкіндіктер ашады.
Просмотров: 5